Алматы облысында 22 қарашадан ревакцинациялау курсы бастау алды. Бүгінгі күнге 333 адам үшінші рет екпе салдырды. Олардың 274-і медицина қызметкері болса, 7-еуі мұғалім. Бұл туралы «Jetisy Media» алаңында өткен баспасөз-мәслихатында мәлім болды.
Вирусқа қарсы имундық жүйені күшейтуге арналған ревакцинациялаудан алғашқылардың бірі болып, медицина мамандары, ұстаздар мен қарулы күштер қызметкерлері және 60 жастан жоғары тұлғалар өтеді.
«Аталған вакциналаудың екінші кезеңі 2022 жылдың қаңтар айында басталады. Бұл кезде, алғашқы вирусқа қарсы вакцинаның екі кезеңінен толық өткен облыстың барлық тұрғындары өз еріктерімен ревакциналаудан өтуіне мүмкіндік алады»,-деп атап өтті эпидемиолог дәрігер Рандир Сахариев .
ДДҰ-ның кеңесіне сүйенсек, «Спутник V» вакцинасын қабылданғандар үшінші рет егілген жағдайда «QazVac» және «CoronaVac» екпелерін тоғыз ай өткеннен кейін салдырғаны абзал.
Айта кетейік, ел аумағында ағымдағы жылы 15 қарашадан бастап, жасөспірімдер, жүкті және омырауда нәрестесі бар аналарға екпе егу жұмыстары жүргізілуде. Жалпы, 225 810 адам «Комирнати» вакцинасымен иммундауға жатады, оның ішінде 12 – ден 18 жасқа дейінгі балалар – 147 000, жүкті әйелдер – 34 510, лактация кезеңіндегі әйелдер-44 300.
3-желтоқсандағы ресми мәліметтер өңірде 3046 жасөспірім, 520 лактация кезеңіндегі әйел мен 136 жүкті келіншектің «Комирнати» екпесінің алғашқы бөлігін қабылдағанын көрсетіп отыр.
Дегенмен, аймақта әлі күнге коронавирусқа қарсы вакцинациялау жүргізіліп жатқандығын атап өткен жөн. Қазіргі таңда екпенің бірінші бөлігін 859 481 адам, екінші компонентін 790 352 тұрғын салдырған.
«Алматы облысында коронавирусқа қарсы вакцинаны салуға арналған 318 егу пункті жұмыс жасап тұр. Сондай-ақ, 76 жылжымалы егу пункті бар»,-дейді Алматы облысының санитарлық-эпидемиологиялық бақылау департаментінің баспасөз-хатшысы Әлия Шагиахмет.
Бүгінде облыста Гам-КОВИД-ВАК («Спутник V»), «Qaz Covid-in», «Sinopharm Vero Cell» сынды екпенің үш түрі бар.
Естеріңізге саламыз, Алматы облысында барлығы 57 365 коронавирус ауруы тіркелді, оның ішінде 42877 адамнан КВИ белгілері анықталып, 56 647 адам емделіп шықты. Өткен тәулікте облыста вирус жұқтырудың 38 жағдайы тіркелді, тәулігіне өсім – 0,1% – ды құрады.
