Өмір айдынындағы алып кеме, дауылдан қорғар қалқан, адамзаттың асыл мұрасы-Отбасы. Керегесін кеңге жайған, босағасы берік, шаңырағы шаттыққа толы мерейлі ортаның ошағының оты сөнбеуі қашанда маңызды. Пенденің келте ғұмырындағы басты мекен-ыстық ұясы. Қыркүйек айының екінші жексенбісі адам атаулының алтын ордасы- отбасы күні аталып өтіледі.
Алматы облысындағы Талғар ауданында 520 жас отбасы отау құрды. Бұл көрсеткіш шағын мемлекеттің туын тік көтеруге ниетті жас буынның артып келе жатқандығын көрсетуде. Елімізде, көпке үлгі боларлық отбасылар жетерлік. Олардың көбісі бір мамандықтың тізгінін ұстаған жандар. Яғни, жанұя мүшелеренің барлығы дерлік бір бағытта еңбек етеді. Солардың бірі – Ролан Мамырұлының отбасы.
«Ата көрген оқ жонар, шеше көрген тон пішер» демекші, ағайындылар ата-ананың ізімен медицина мамандығына оқуға түседі. Ролан Мамырұлы, қазіргі таңда Іле ауданындағы аймақтық балалар ауруханасында бас дәрігер қызметін атқарып отыр.
Ролан Мамырұлының өзі құрған отбасы да дәрігер мамандағын жандарына серік еткен, отанасы Динара Мырзақожина көз дәрігері. Қос ақ халатты абзал жанның перзенті де дәл осы жолды таңдамаққа бел буып отыр екен. Қыздары келер жылы медицина университетінде білімін жалғасытруға ниеттенген жайы бар.
Ролан мырза «отбасы ол біздің –қорғанымыз. Жылы ұямыз. Бір-біріне сүйеу болып, білмеген тұсында үйрететін, ең жанашыр жандар жиналған мекен» деген пікірде.
Дәл осындай үлгілі отбасылардың қатарын, Кендебай Темірбайұлы мен ҚР Халық артисі Кенжебекова Алмахан Нүрпейісқызының отбасылық одағы толықтырып отыр. «Жетісудың қос жұлдызы» атанған өнерпаздар Б.Римова атындағы Талдықорған драма театрының негізін қалаушы артистердің бірі. Алмахан Кенжебекова мен Кендебай Темірбайұлы өнердегі еңбек жолын 1975 жылы Талдықорғанда тұңғыш ашылған драма театрының қабырғасында бастады. Яғни жас театрдың шаңырағын көтеріп, уығын шанышқандардың бірі. Отанның қорғаушысы, елінің есті, білімді азамат болып өсуіне жол көрсету, тілекшісі болу – ата-ананың негізгі міндеті. Темірбаевтар отбасы 2 ұл, 1 қыз тәрбиелеген өнер иелері.
Бұл күнде театр ұжымының сыйлы адамы, жастардың жол, жөн көрсетер ақылшысы, ұстазы Алмахан Кенжебекова театрды бірге ашқан, өмір мен өнер сапарында жұп жазбай қиындығы мен қызығын бірге көріп келе жатқан жұбайы, театр актеры Кендебай Темірбайұлы екеуі Медеу, Айдын, Толқын деген ұл-қыздарын, Дана, Әйгерім, Ербол деген келіндері мен күйеу баласын, Ален, Тахмина, Адина, Алдияр, Адият, Алуа, Діннұрмұхаммет деген немерелерін тәрбиелеп өсірген ұлағатты Әке-Ана, Ата-Апа. Қырық алты жыл қол ұстасып еңбек етіп келе жатқан бақытты жанұя, өнегелі отбасы.
Жетісу өлкесінің өнелегі жанұясының артынан еріп, өздерінің шағын мемлекетін құрғандар да бар. Олар Талдықорған қаласындағы жас отбасылардың бірі. Мейржан Құрмашев пен Арайлым Тұрсымбекова. Үлкен өмірге қадам басқан қос ғашық, «отбасы-егемен елдің алтын діңгегі» деген пікірді басты ұстанымдарына айналдырған.
«Біз Отбасы күні мерекесі қарсаңында үлкен өмірге бірге аяқ басып, алғашқы ортақ қадамымызды бастадық. Отбасы – егемен еліміздің кірпішін қалап, негізі болатын алтын діңгек екені белгілі. Сол себепті, біз өз жауапкершілігімізді түсінеміз. Бүгінде әулеті өсіп-өнген аға буын жанұялардың өмірлік қағидаларын үлгі етіп, берік отбасы болатынымызға сенімдіміз. Барша шағын мемлекет атанған отбасыларды мерекемен құттықтаймыз»,-дейді жас отбасы.
Облыс орталығындағы жас отбасылар қатарын Аубекеровтер жанұясы толықтырады.
Нұрлыбек пен Салтанаттың шаңырақ құрғандарына 5 жыл. Бүгінде олар, Дінмұхаммед және Нұрмұхаммед есімді екі балапанды тәрбиелеп отыр.
«Жастықтың оты жалындап…». Абай атам айтқандай дәл қазіргі кезде біздің жас жүрегіміз жанып, талабымыздың аты арындап тұрған шағымыз.Жан-жарым екеуміз де,халықтың алдында өнер көрсетіп,алғысы мен батасына ие болып жүрген жәйіміз бар. Отбасы-өмірдегі басты құндылықтардың
бірі.Сондықтан,әрбір мүшесін әркезде ардақтап,аялап,құрметтей білу керек»,- дейді отанасы Салтанат Спандиярова.
Қазыбек би өз дәуірінде, «Алтын ұя-Отан қымбат» деп айтып кеткен еді. Ал, отанның шағын отбасынан басталатынын ескерсек, ұлар биікке апаратын жолда жанұядан бастау аларын естен шығармаған абзал.
