Алматы облысында коронавирус індетін анықтайтын зертхана ашылмақ. Аталған медициналық мекеме Еңбекшіқазақ ауданында бой көтереді деп жоспарланған. Бүгінде жер жаһанға кеңінен танылған ПТР зертханасы ауданаралық көпсалалы ауруханасының жанына қоныстанады.
Полимерлі тізбекті реакция талдауы «Covid-19» инфекциясын жылдам анықтаудың бірден-бір жолы.
Облыстық денсаулық сақтау басқармасының аталған зертхананы Еңбекшіқазақ ауданына орналастыруының өзіндік себебі де жоқ емес.
Өйткені Есік қаласындағы емхана өңірдегі ең ірі медициналық мекеме қатарынан табылады. Қазіргі таңда Еңбекшіқазақтағы аудандық ауруханадағы медицина қызметкерлері індет жұқтырған науқастарды қабылдап, ем-шара жұмыстарын жүргізуде.
Ал зертхананың ашылуы аймақтағы аурухана қызметінің сапасын жақсартуға ықпал етеді. ПТР зертханасында жұмыс істейтін мамандар әлден біліктіліктерін арттырып, жаңа қызметке кірісуге сақадай сай. Кеселге қатысты талдау алынатын мекемеге тек дәрігердің жолдамасымен, сондай-ақ инфекция белгілері болған жағдайда диагностикадан өтуге келе алады.
Жаңа медициналық орынның ашылуын күтпей-ақ, аймақтағы ақ халаттылар жұқпалы аурумен күресуде. Аудандық ауруханада карантин стационары 13 наурыздан бастап қызмет етіп келеді. Онда осы кезге дейін 140 адам ем алған. Оның 100-і құлан таза сауығып шыққан.
Одан басқа, правизорлық стационарда 86 науқастың 80-і дерттен айыққан. Әлі де болса 36 жан кем-дом қабылдауда.
Айта кетерлігі, облыстық «Birgemiz Jetisy» қоғамдық қоры заманауи талдау жүргізу орталығының ашылуына қаржылай көмек қолын созып отыр.
